الطيب النقر

كان بدري عليك
يا سحاب بطانة الخير ___________ في صيف عام ١٩٩١ اكملت المرحلة المتوسطة، وقلت لازم اسافر اجازة صيف عشان ، الواحد بقي كبير ودخلنا مرحلة لبس البناطليين والكتابة بالقلم الجاف ، اخترت وجة سفري الي منطقة الجزور والاجداد بطانة الخير ثم الي قريتي الحبيبة (ابوجلفا) . طلعت أودع طابت كاني ماشي اغتراب ، ماني صغير وجاهل، وتوجهت الي الحصاحيصا العليها سحاب اخضر، ومن ثم البنطون شايل كل البشر والانعام والعربات والناس اشكال والوان يحملون الامتعة، وفي الطرف حاجة كبيرة تكورك تعال يا ولد امسك هنا ، وعمك كبير شايل بطيخة يضاري منها من الناس اظن خايف عليها من العين ، وصور وحياة عجيبة داخل البنطون تحلف تقول سفينة تايتنك، والسواق معنقل فوق وماسكلو كبابة شاي ، قلت الزول ده بستهتر بارواحنا ولا شنو يا عمك انا لسه ما دخلت الثانوي العالي ما تضيع شبابنا، وانتهت الرحلة ونزلنا رفاعة الصباحا جميل ، وسألت من عربات الحلة قالوا هناك جنوب السوق ،اول ما وصلت لقيت عمك كبير منتظر المواصلات ،الزول ده شايقي ومشلخ تب ، قام سالني انت يا جنا ماشي اب جلفا قلت لي اي ، قال لي انت غريب اول مرة اشوفك ،قلت لي انا من طابت ،ماشي ناس جدي حوش سعد فريق العوضية ،طبعا ده وصف محمد ود فتح الرحمن عمي ،قال بنتظرني في مظلة الحلة عشان اوصلني البيت ،محمد مخلوق من طين الحنية ومن عطر المحبة . عمنا الشايقي قال لي طالما انت من طابت ، ابقي انت ود ناس الطاحونة ،هذا لقب جدتي لأبي، لها الرحمة والمغفرة، قلت لي ايوة قال لي انا دفعة عمك العوض له الرحمة والمغفرة، وترافقنا بالبوكسي الي أن دخلنا الحلة ،كان يوم لاينسي، صادفت في هذا اليوم زواج عمنا احمد العوض شريشة والعروس بت العم سنية التاي عباس ، ابقي هنا نحن دخلنا حوش ناس العرس عشان الديوان كان محل المناسبة، الناس ناس في بساطتهم لكن معدنهم اغلي من الذهب ،الحب أروع مافي الكون تغزلة خيطا من الشمس او قطر من السحب ، ووجدت شباب كثر في عمري وكان اميرهم في هذا اليوم هو اخونا محي الدين التاي عباس ، عشان ده اخو العروس ، كان اخي وصديقي المرحوم عبدو السر سعد كثير المزاح ،والضحك يقول لمحي الدين ،جيب العشاء هنا والعصير للضيف ود طابت ، والجميع يضحكوا، هنا جانا ابن عمنا المرحوم الاستاذ بله التاي عباس وعرفوهو الجماعة يا استاذ بله ده الطيب ود احمد المبارك ناس طابت ، سلم علي تاني وقال الف رحمة ونور تنزل ع عمنا فتح الرحمن المبارك وحكي ذكريات امدرمانية، ومن هنا اصبحت علاقتنا اكثر من صله رحم وصرنا اصدقاء ، كان الراحل المقيم استاذ بله رجل شامل علم ورياضة واجتماع ، تحلف تقول ده كنترول القرية، وصارت لنا حكاوي وونسات كل ما تجمعنا المناسابات كان راحلنا المقيم ،رجل ذو اسلوب جميل وحكاوي وجابر للخواطر، ومحبوب للجميع حتي فترة النزوح ايام الحرب كنت ع تواصل معه وهو في عطبرة . كان محبوب واصل للارحام ، اذكر قال لي جاني نسيب من الحلاويين جمبكم، قلت لي كده دخلتوا التاريخ عبر بوابة ود حبوبة وقعد يضحك ،يا سلاااام عليك يا زول يا رائع حقا انك وريث الانبياء ، الي أن إصابة المرض وذهب الي ارض الكنانة مستشفيا، الي انا جاء الخبر عبر الناعي في ذمة الله الاستاذ بله التاي عباس ، يا حليل شمس المحنة الغربت طاحت ، ولسان حالي يقول انتظر حدثني لا تعجل تفوت، يبقي لا تلاقيني بكرة وراك بموت . وداعا يا دهب البطانة ،وداعا يا وريث الانبياء، برحيلك رحل كل الجمال من بلدنا ورجع كنز ثمين لباطن الارض، استاذ بله زول جميل في بلدنا مااااااات ، عجلت الرحيل ذي كانك لاحق شقيقك الكابتن خالد التاي، رحل في عز الشباب ،الموت نقاد بشيل الاخيار ،اللهم تقبله القبول الحسن وانزله الفردوس الأعلى من الجنة واجعل البركة في ذريتة جبر الله الكسر واحسن العزاء خالص التعازي لعموم الاهل (الطيب النقر 17/6/2026)